محمد فهيم يكتب عن «دخول شهر بابه»

و"ان صح زرع بابه, غلب القوم النهابه, و إن خف زرع بابه, مايبقاش فيه ولا لبابه" ...
" بابه خش واقفل البوابة " ...

طيب ايه الكلام ده ؟
شهر بابه هو الشهر الثاني فى التقويم المصري القبطي القديم ... وفيه يعبر فصل الخريف عن نفسه بقلب جامد بكل مظاهره المناخية وهي:
* انكسار درجة حرارة النهار وبدون عودة للأجواء الحارة مرة تانية الا مناوشات يائسة قبل دخول الشتاء.
* بداية الاحساس بلسعة البرد فى اواخر الليل او فى الصباح الباكر وزيادة احتمالية الاصابة بنزلات البرد.
* زيادة كبيرة فى الرطوبة الجوية والرطوبة الحرة والندى الغزير صباحاً.
* زيادة فرق درجات الحرارة بين النهار والليل .
* بداية ظهور الشبورة المائية صباحاً فى الوجه البحري خصوصاً على الطرق السريعة.
* بداية تكاثر السحب المنخفضة والمتوسطة وبداية مناوشات الامطار خاصة على السواحل والدلتا.

أما على مستوى الزرع:
* تحول بعض المحاصيل إلى التزهير على حساب النمو الخضري (الفاصوليا – الطماطم – الباذنجان – الفراولة ....الخ).
* بداية ازعاج الامراض الفطرية والبكترية المحبة للرطوبة الحرة (التبقعات والندوات على محاصيل الخضر النيلية بالتحديد).
* فى نهاية شهر بابه يبدأ زراعة القمح والبرسيم (الاسبوع الاول من نوفمبر) وينصح بعدم التأخير هذا الموسم (بعدين نشرح السبب).
* فى منتصف الشهر هتبدا البطاطس الشتوية فى التحجيم الطبيعي بسبب انخفاض الحرارة ليلاً وممكن اساعد باضافة البوتاسيوم ( 0-0-50) مع الري بمعدل 10-15 كجم للغمر و 5-6 كجم للتنقيط. وممكن ارش نترات او سترات بوتاسيوم برده (1.5 كجم / فدان).
* ونفس الأمر للفاصوليا البيضا (الجافة)....

د. محمد علي فهيم
10 أكتوبر 2021