السبت 13 أبريل 2024 مـ 02:58 صـ 4 شوال 1445 هـ
موقع الأرض
رئيس مجلس الإدارةخالد سيفرئيس التحريرمحمود البرغوثيالمدير العاممحمد صبحي

مقترحات تطويرية لنقابة الأطباء البيطريين

د. شيماء الجبيلي
د. شيماء الجبيلي

بعد توفيق مجلس محترم مهني خدوم لنقابة الأطباء البيطريين المصريين، بقيادة الدكتور مجدي حسن، اسمحوا لي أن أسجل هنا عددا من المقترحات، التي أراها تصب في مصلحة الطبيب البيطري والمهنة والدولة، وسلامة الأغذية في مصر.

أولا: حملة دعائية لمرشحي نقابة الأطباء البيطريين لمدة عامين

- عندنا مشكله كبيره اوى ف الانتخابات وهى ان فى كتير جدا من المرشحين مبيلحقوش يعبروا للناس عن أفكارهم فى فترة الدعايا الانتخابيه وفى منهم بيكونوا ناس كويسين جدا جدا ايه المشكله لو اتعملت صفحه مثلا بإسم انتخابات النقابه ويضاف اليها جموع الأطباء البيطريين من جميع المحافظات ويبدأ اللى حابب يرشح نفسه يعرض افكاره وخدماته اللى بيقدمها وبكدا نقدر احنا كأطباء بيطريين نستفاد بفكر عدد كبير من الدكاتره وكمان خدمات لا حصر لها طوال السنتين الدعايا ونفس الوقت الطبيب البيطري اللى رايح ينتخب يبقا عارف هو رايح يختار مين عاوزه اقولكم وانا واقفه عاللجنه معظم الناس تسألهم اختارت مين يقولك والله م عارف اختارت وخلاص هو بيبقا عاوز حد معين وبيكمل الباقي اى حد وخلاص اظن لو المقترح دا حصل هيتم التغلب على تفتيت الأصوات بلا هدف والورقة الدواره والتكتلات وهيطلع لنا ناس خدومه ومحترمه ونقابيين بجد دا غير الخدمات والأفكار اللى كلنا هنستفاد منها طوال السنتين

ثانيا: نشاط أكبر لأعضاء المجلس في النقابات الفرعية للأطباء البيطريين

- دلوقتى احنا عندنا ١٢عضو للقطاعات و١٢عضو مجلس نقابه: ايه المشكله لو عدلنا اللايحه التنفيذيه وخلينا المهام الأساسية لأعضاء القطاع خدميه فقط، وكبرنا دور الفرعيات، يعنى مثلا مينفعش يبقا فيه نقابات فرعيه دورها فقط جمع الاشتراكات ونقابات تانيه شغاله شغل كبير جدا رأيي يتم عمل اجتماع اون لاين لاعضاء القطاعات مع النقابات الفرعيه، ويتم تبادل الأفكار، بحيث يبئا دور الفرعيات كبير شويه، وتكون هي المسئول الأساسي عن الدورات والمراكز العلميه، والمركز العلمى فى القاهره تديره نقابة القاهره، والدورات تكون موحده على مستوى الجمهوريه، بمعنى ان مثلا شهر ٣ هتتعمل ٤ دورات كل دوره اسبوع فى كل نقابه فرعيه، الأول دواجن، التانى "لارج"، التالت "بيتس"، الرابع سلامة غذاء مثلا، ودا يكون برنامج موحد على كل الفرعيات في نفس الوقت، وكل دوره تبقا متكامله بحيث يكون فيها الجزء الأكاديمي ويدرسه استاذ الجامعه، الجزء المعملى ويدرسه استاذ المعهد، والجزء الخاص بالفيلد يدرسه طبيب الفيلد، والجزء الخاص بالإجراءات القانونيه ويدرسه طبيب المديرية، وبالتالي انا وفرت على عدد كبير من المتدربين عناء السفر وكمان دربتهم برنامج متكامل، وباقترح الدورات تكون مجانيه بالكامل ويتحمل تكلفة الخامات المستخدمه الشركات الخاصه بالدعاية، واقترح ان الأطباء المدربين يكونوا متطوعين لخدمة الزملاء.

خدمات النقابات الفرعية للأطباء البيطريين

- وبالنسبه لباقي دور الفرعيات، أقترح التعاقد مع "هايبر ماركتات" لها أفرع كثيره ومحلات ملابس واحذيه واجهزه منزليه ومعارض سيارات ومعارض إسكان، وذلك بدون اللجوء للصندوق نهائيا فى الدعم، بل باللجوء لخطة تعظيم القوى الشرائية لدى هذه المولات والمحلات، بأن يوجد ٨٠ الف طبيب بيطري هيشتروا من فروعك فى جميع المحافظات بشرط الخصم.
- بالنسبه للرحلات، يتم عمل برنامج رحلات موحد على مستوى الفرعيات، ويقوم بتنسيقه فقط الفرعيات بالاشتراك مع القطاعات، وبكدا اكون عززت روح الاخوه والتعاون والمحبه بين جميع الزملاء من جميع المحافظات بحيث ان مثلا كل شهرين هيتجمعوا كلهم فى مكان ترفيهي معين، ويطلع "باص" من كل نقابه فرعيه ويتوحد البرنامج فى نفس الاوقات.
- أيضا يتم التعاقد مع النوادى الخاصه بالاطباء فى جميع المحافظات بأن يتم تطويرها وإدخال بها العاب رياضيه، وتكون اشتراكات الأطباء البيطريين السنويه مبالغ رمزيه.
* وفي نفس الوقت لو حصل مشكله لأي زميل، هيكون عضو القطاع مع النقابه الفرعيه هما المسئولان عن حلها
* أقترح أيضا توفير موظف فى كل نقابه فرعيه، تكون مهمته فقط تخليص الأوراق والاجراءات لترخيص العيادات، وبالتالي نوفر على الزميل وقت ومجهود.
** وهنا: تكون النقابة الفرعية ساهمت فى تدريب الطبيب على اكفأ مستوى ووفرت له خدمات جيدة، وجعلت ملجأه النقابه وبيته التانى النقابه، وقصرت دائرة حلول مشاكله المهنية داخل النقابه، وعضو القطاع سهله كل دا، واتفرغ للقطاع بتاعه وخدمته، وأثبت كفاءته بجد.

** وبذلك، أكون كنقابة فرغت ١٢ عضوا آخرين لملفات المهنه فقط، فلو كل سنة اشتغل 12 عضوا على نقطه واحده بس، ستنجح النقابة في حل 4 مشاكل رئيسية خلال دورة المجلس في 4 أعوام، وتكون النقابة قدمت لكل طبيب خدمات لا حصر لها.

اقتراح لتعديل قانون نقابة أطباء بيطريين مصر

يعنى مثلا اول حاجه القانون ... دا عشان يتم تعديله، هيتم تشكيل لجنه من حكماء المهنه من كل مجال: الكليه والمعهد والهيئه والمجازر والمحاجر والمديريات والوحدات والفيلد، ويتم وضع قوانين ولوائح تنفيذية تفيد الطبيب بجد وتحميه وتسهله أموره وتجيبله حقوقه، فلو 12 عضوا سابوا كل حاجه خدميه للقطاعات وركزوا على تمرير قانون محترم يحمى الزملاء ويعطيهم حقوقهم، والله هيعتبر انجاز رهيب.
- لو تم وضع لائحه ماليه محترمه تقيد المصروفات اللا متناهيه هيعتبر انجاز رهيب.
- لو تم ضم الأطباء البيطريين فى القطاع الحكومي ككل للدوله بدلا من العاملين بوزارة الصحه فقط لكادر المهن، هيعتبر انجاز عظيم.
- لو تم إيضاح الرؤى بصوره صحيحه للدوله على خطوره العدوى وما يتعرض له الطبيب البيطري يوميا، سيتم تعديل قيمة بدل العدوى من 45 جنيها فقط، إلى مبلغ يليق بالطبيب البيطري.

مشاكل المطالبة بتعيين الطبيب البيطري

- اما بالنسبه للتعيين، فأرى عدم المطالبه بتعيين الطبيب البيطري بصوره مباشره، لان هذا يعتبر مطلبا فئويا، والدوله لا تنظر للمطالب الفئويه والفردية، بل يجب تسليط الاضواء يوميا على خطورة الأمراض المشتركه، بين الإنسان والطائر والحيوان، وكيف تتسبب يوميا فى تكلفة الدوله الملايين من الجنيهات فى المستشفيات الحكوميه لعلاج المواطنين، وكيف ان وجود الطبيب البيطري فى هيئة سلامة الغذاء او المديريات وتكليفه وليس تعيينه، سيكون أمرا ضروريا وموفرا للبلد ملايين الجنيهات المصروفه على العلاجات، وبالتالي يتم ادراجها تحت مبادرة السيد الرئيس "١٠٠ مليون صحه".
* أرى أن تسليط الأضواء على هذه النقاط، سيُظهِر للدولة أهميتنا وأننا هنوفر اد ايه لميزانيات، فهنلاقي تغيير كبير فى نظرة الدوله لاهميتنا وهنلاقي وقتها مكاسب كبيره للمهنه من الدوله.

دور المجازر البيطرية وأهمية دعمها بحراسات أمنية قوية

- عندك بئا المجازر، وهي الأولى أيضا بتسليط الضوء على ضرورة دعمها بحراسات أمنية قوية، وتبيان خطوره عدم وجود افراد أمن فى كل مجزر لحمايه صحة المواطنين وحمايه الطبيب البيطري من التعدى، والتهديد بالسلاح، لتمرير ذبائح مخالفه.
وبتنفيذ هذا المقترح، اكون حميت زمايلي وبئا قانونى لازم وجود أفراد أمن مدربة فى كل مجزر.

** كل هذه مجرد مقترحات، انتظروا مقال اخر فى مقترحات لحل مشكله "الباراميديكال"، ومقترحات أخرى لحل مشكله الدواء المغشوش، ومقترحات لحل مشكله اسعار الدواء.