من هو المهندس الزراعي ؟
أولا يجب أن نعرف ماهي الهندسة، فهي علم يَبْحث في الخُطُوط والأَبْعاد والسُّطُوح والزَّوايا والكمِّيّات أو المقادير المادِّيّة من حَيث خواصُّها وقياسُها أَو تَقْويمها وعلاقة بَعْضها ببَعْض.
فالنبات عبارة عن منظومة هندسية حية معقدة جدا، والنمو فى النبات هو محصلة نواتج التفاعل بين "المدخلات" والمخرجات"، وكل ما نعرفه عن هندسة النمو في النبات هو الحد الأدني من الحقيقة والواقع.
فعلى سبيل المثال، خلال التغيرات المناخية المناخية المتلاحقة وتقلبات المتعاكسة، من الذي يمكنه أن يفسر لنا ما يحدث؟؟
** نروى ولا نستني؟ نسمد ولا نرش؟ طب نسمد بأيه ؟ أو نرش بأيه؟ نعزق ولا نفوت؟ نقصف ولا نشيح؟ نزرع دلوقتي ولا نستني شوية؟ نقلع دلوقتي ولا نصبر؟ نهوي البلاستيك ولا لأ وامتى وازاي؟ .... هيصة هيصة هيصة .. ودربكة
** نعمل ايه فى القمح اللى نصوم ولا نروي ؟ طب واللى لسه ما طردشي؟
** نعمل ايه فى البطاطس الشتوى ؟ طب والصيفي المزروعة في اول 12 طب واللى مزروعة فى اخر يناير؟
** نعمل ايه فى طماطم وكنتالوب وبطيخ الانفاق ؟ طب والمكشوف ؟ والفلفل والباذنجان ؟؟
** نعمل ايه مع المانجو والزيتون والعنب والنخيل وباقي الفاكهة؟ نسمد بايه ونروى ازاى ونرش ايه ؟؟ ....
** طب الفراولة والخرشوف والبصل والثوم ؟ طب الشمر والكمون واليانسون ؟ طب الحمص؟ ...
** طب نزرع الذرة والارز هجين ايه او صنف ايه ونزرع امتى؟ طب وفول الصويا والسمسم وعباد الشمس نزرعهم امتى ونعمل ايه؟؟
وكتير قوي !!
طب انت كمزارع وعندك خبرة كبيرة وطويلة بتلف حوالين نفسك ... مش كده ؟؟
يجي هنا بقه وظيفة "المهندس الزراعي" سواء كان باحث/دكتور/خبير ... بحكم انه "مهندس" ... يهندس ويمخمخ .. ويفك ليك الاشتباك ده ..
(((اقدر اقولكم وبصوت الواثق فى كل حرف ان "المهندس الزراعي" هو القائد والبطل وبدونه وبجنوده (المزارعين والعمال الزراعيين) ... لا زرع ولا قلع ولا تصدير ولا تصنيع ولا اكل ولا شرب))) ...
انا افتخر اني "مهندس" زراعي .. ومزارع .. وفلاح .. ومن قلعة المرزايق
